Шуақ шашқан көктегі алтын күніміз,

Ана тілім-ар-намысым,біліңіз.

Қасиетін қанымызға сіңірген

Тұғырында,тұғырында - тіліміз!..

Ана тілім-ерлігім мен елдігім,

Ана тілім-кемелдігім, кеңдігім.

Ғасырлардан маған жеткен қазына-

Өз тілімді мақтан етем мен бүгін.

Қазағының ұлылармен бағы-айдын,

Ана тілім – асыл тілі Абайдың.

Ана тілім-толқыны ұрған тарихтың,

Бастан кешкен талай қайғы, талай мұң.

Ана тілім-ата-дәстүр,салтымыз,

Ана тілім-абырой мен даңқымыз.

Ана тілім келешектің кілтіндей,

Ел бағына жаратылған жалқымыз.

Өткенінен соққан өмір өкпегі,

Келешегі  – гүл жайнаған көктемі.

...Тілім-тілім тілімденген өз тілін,

Мәпелейді егемен ел,текті елі.

Ана тілім-тамыр жайған қарт емен,

Тілім барда биік менің мәртебем.

Бойға сіңген ақ сүтімен ананың,

Тіл қадірін төмендетпес мәрт өрен.

Кереметі-ай, киелі елдің салтының!

Тілім барда қанаттандым, шалқыдым.

Болашақтың босағасын бірге атта,

Ана тілім, айналайын, алтыным!..