Ұрпағыңа ұлағат сіңіре бер!
Ұрпағыңа ұлағат сіңіре бер!

Құшағыңда ешқашан болмай түнек,

Қиясына қиялдың самғайтын ек.

Асқарына алпыстың келдіңіздер,

Қандай тілек айтайын,қандай тілек?..

 

Назар салып оң-солға,қас-қағымда әр,

Адалдықтың жолынан аспадыңдар.

Балапанын баптаған қырандайын,

Биіктерге біздерді  бастадыңдар.

 

Тектіліктің тауына тең едіңдер,

Ар теңізін бетке алған кеме едіңдер.

Мен құласам,жыласам-жұбаттыңдар,

Мен сүрінсем қолтықтан демедіңдер.        

 

Бәйгесінде өмірдің құлап-тұрып,

Қара өлеңді сүйіп ем жылап тұрып.

Қолдадыңдар,тек мені қорғадыңдар,

...Осы екен ғой, қамқорлық-тұрақтылық!..

 

Бағбандайын  өсірген тал-қайыңды,

Көп сұрадың қиналсам хал-жайымды.

Тосып келдің тұрлаусыз тіршілікте,

Мені тепкен тепкіге маңдайыңды.

 

Сезіміңнен ғажайып сезем үлгі,

Аямадың бір менен сөз-еміңді.

Ұл-қызыңа Жаратқан  қажет қылса,

Берер едің суырып өзегіңді.

 

Серпіп тастап мұң басқан мұнарымды,

Мәпеледің шыңға ынтық шынарыңды.

...Тұнжыр түнде кейде ұзақ отырамын,

Ойыма алып алғысың-тұмарымды.

 

Баса алмастан ақеділ аптығымды,

Мен қуансам, бөліскен шаттығымды.

Тамылжыған таң күтіп  Бір Алладан,

«Бұлт шалмасын» деп тілер бақ-күнімді.

 

Қасиеттің иесі-қарағайым,

Пейілдерің дархан ғой даладайын.

Бағалаған сендерді дара дәйім,

Қуанышты бөліскен бар ағайын.

 

Ақ құсымның тұратын сүйіп үнін,

Көңіліңнің төгілсін күйі бүгін.

Атыңыздан,ата-ана,айналайын,

Ақ ордасын жықпаған пейілінің!

 

Өнегелі ұзақ боп өмірлерің,

Толы болсын шаттыққа көңілдерің.

Ұрпағыңа ұлағат сіңіре бер,

Қабыл болсын ақ тілек небір керім!..

 

Алма ТүсіпбековаАлма Түсіпбекова
2 жыл бұрын 518
3 пікір